Türkmenistanyň Döwlet gümrük gullugy

Türkmen wekiliýeti Bütindünýä gümrük guramasynyň Ýewropa sebitiniň Gümrük edaralarynyň ýolbaşçylarynyň maslahatyna gatnaşdy

Mon, 20 Apr 2026 17:39:02 +0500

2026-njy ýylyň 16-17-nji aprelinde Brýusselde Bütindünýä gümrük guramasynyň (BGG) ştab-kwartirasynda Guramanyň Ýewropa sebitiniň Gümrük edaralarynyň ýolbaşçylarynyň her ýylky maslahaty geçirildi. Oňa Türkmenistanyň Döwlet gümrük gullugynyň başlygynyň orunbasarynyň ýolbaşçylygyndaky wekiliýetimiz işjeň gatnaşdy.

Bu ýylky Maslahat Bütindünýä gümrük guramasynyň Ýewropa sebiti boýunça wise-başlygy Megan Şounyň ýolbaşçylygy astynda geçdi. Maslahat Ýewropa sebitindäki ýurtlaryň gümrük edaralarynyň ýolbaşçylaryny, Sebitleýin aňtaw gullugynyň aragatnaşyk edarasynyň (RILO) we Sebitleýin mümkinçilikleri ösdürmek boýunça edaralarynyň (ROCB) wekillerini özünde jemledi.

Maslahatyň dowamynda gatnaşyjylar gümrük mümkinçiliklerini güýçlendirmek, gümrük edaralarynyň durnuklylygyny ýokarlandyrmak we hususy pudak bilen hyzmatdaşlygy mundan beýläk-de ösdürmek barada pikir alyşdylar. Sebitleýin hyzmatdaşlygyň ileri tutulýan ugurlaryna we utgaşdyryş mehanizmlerini kämilleşdirmäge aýratyn üns berildi. Şeýle hem, BGG-niň sebitdäki häzirki başlangyçlary ara alnyp maslahatlaşyldy we degişli edaralaryň we sebitleýin ulgamlaryň işlerine umumy syn berildi.

Maslahata türkmen wekiliýetiniň gatnaşmagy ýurduň halkara gümrük hyzmatdaşlygyny güýçlendirmäge, iň gowy tejribeleri alyşmaga we milli gümrük ulgamyny häzirki zaman halkara standartlaryna laýyklykda ösdürmäge ygrarlydygyny tassyklaýar.

Türkmenistanyň we Özbegistanyň gümrük gulluklarynyň arasynda üstaşyr daşamalarynyň sanlylaşdyrylmagy boýunça iş duşuşygy geçirildi

Wed, 15 Apr 2026 17:51:00 +0500

2026-njy ýylyň 15-nji aprelinde Türkmenistanyň Döwlet gümrük gullugy bilen Özbegistan Respublikasynyň Ykdysadyýet we maliýe ministrliginiň ýanyndaky Gümrük komitetiniň arasynda göni wideoaragatnaşyk arkaly duşuşygy geçirildi.

Duşuşygyň dowamynda taraplar üstaşyr ýüklerini gümrük taýdan resmileşdirmek ulgamynda häzirki zaman sanly çözgütleri ornaşdyrmak bilen bagly meselä seretdiler. Hususan-da, kagyzsyz tehnologiýalary ösdürmek, bitewi üstaşyr resminamasyny ulanmak hem-de degişli kadalaşdyryjy-hukuk binýadyny işläp taýýarlamak we kämilleşdirmek boýunça özbek tarapynyň tejribesi öwrenildi.

Şeýle hem, netijeli üstaşyr mehanizmlerini döretmäge gönükdirilen ikitaraplaýyn hyzmatdaşlygyň geljegi ara alnyp maslahatlaşyldy.

Geçirilen duşuşyk taraplaryň gümrük ulgamynda hyzmatdaşlygy mundan beýläk-de çuňlaşdyrmaga we häzirki zaman çemeleşmeleri ösdürmäge gyzyklanma bildirýändigini tassyklady.

Türkmenistanyň Prezidenti Serdar Berdimuhamedow ýokary tizlikli awtomobil ýolunyň jemleýji tapgyrynyň açylyş dabarasyna gatnaşdy

Sat, 11 Apr 2026 10:33:19 +0500

Hormatly Prezidentimiz Serdar Berdimuhamedowyň gatnaşmagynda Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyş dabarasy geçirildi. Bu möhüm waka ýurdumyzyň ulag ulgamynyň yzygiderli ösdürilýändiginiň nobatdaky aýdyň güwäsi boldy.

Döwlet Baştutanymyz Lebap welaýatyna ugramak üçin paýtagtymyzyň Halkara howa menziline geldi.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň ýurdumyzyň ýolgurluşyk pudagyny kämilleşdirmek, täze awtomobil ýollaryny gurmak, täze halkara ulag geçelgelerini döretmek boýunça öňdengörüjilikli başlangyçlary häzirki wagtda hormatly Prezidentimiziň baştutanlygynda üstünlikli durmuşa geçirilýär. Şunuň bilen baglylykda, pudagyň maddy-tehniki binýadyny pugtalandyrmagyň, öňdebaryjy tehnologiýalary ornaşdyrmagyň, bar bolan awtomobil ýollarynyň durkuny täzelemegiň we döwrebaplaşdyrmagyň hasabyna ýük hem-de ýolagçy gatnawlarynyň möçberini artdyrmak babatda zerur işleriň alnyp barylýandygyny bellemek gerek.

Ýurdumyzyň ulag strategiýasy Türkmenistanyň çäginden geçen gadymy Beýik Ýüpek ýolunyň gaýtadan dikeldilmegine esaslanýar. Taryhyň dowamynda Beýik Ýüpek ýoly Gündogar bilen Günbatary baglanyşdyryp, harytlary alyşmaga hem-de medeniýetleri özara baýlaşdyrmaga ýardam beripdir. Häzirki wagtda ýurdumyz bu gymmatly mirasy täzeden dikeltmegi maksat edinip, tutuş sebitiň ykdysady ösüşi üçin ulag geçelgeleriniň, logistikanyň möhüm ähmiýetine ünsi çekýär. Bu wezipäni üstünlikli amala aşyrmakda Aşgabat — Türkmenabat ýokary tizlikli awtomobil ýolunyň ähmiýeti örän uludyr.

Mälim bolşy ýaly, uzynlygy 600 kilometre deň bolan Aşgabat — Türkmenabat ýokary tizlikli awtomobil ýolunyň gurluşygyna 2019-njy ýylda badalga berildi. Bu ýoluň birinji tapgyry bolan Aşgabat — Tejen bölegi 2021-nji ýylda, Tejen — Mary bölegi bolsa 2024-nji ýylda açylyp ulanmaga berildi. Bu iri taslamanyň durmuşa geçirilmegi ýurdumyzyň ählumumy ulag ulgamyna goşulyşmagy bilen bir hatarda, halkara ulag geçelgelerini işjeňleşdirmekde-de uly ähmiýete eýedir.

Ulag ulgamy dünýä ykdysadyýetiniň esasy ugurlarynyň biridir. Ol Birleşen Milletler Guramasy tarapyndan kabul edilen Durnukly ösüş maksatlaryna ýetmekde möhüm orny eýeleýär. Ýurdumyz ulag ulgamynda Birleşen Milletler Guramasy bilen hyzmatdaşlygy işjeň ösdürýär we döwrüň wajyp meselelerini netijeli çözmek boýunça halkara bileleşigiň tagallalarynyň utgaşdyrylmagyna goşant goşýar. Şunda bu gurama bilen köpugurly gatnaşyklara aýratyn ähmiýet berilýär. 2025-nji ýylyň awgustynda «Awaza» milli syýahatçylyk zolagynda BMG-niň Deňze çykalgasy bolmadyk ösüp barýan döwletler boýunça üçünji maslahatynyň geçirilmegi munuň aýdyň mysalydyr.

BMG-niň Baş Assambleýasynyň Türkmenistanyň başlangyjy esasynda dürli ýyllarda ulag ulgamyndaky hyzmatdaşlyga hil taýdan täze itergi bermäge gönükdirilen degişli Kararnamalary, şol sanda «Durnukly ösüş üçin halkara hyzmatdaşlygy üpjün etmekde ulag-üstaşyr geçelgeleriniň orny», «Durnukly multimodal geçelgeleriniň döredilmegine ýardam bermek maksady bilen ulagyň ähli görnüşleriniň arasynda köptaraplaýyn hyzmatdaşlygy üpjün etmegiň ýolunda», «Durnukly ösüş maksatlaryny amala aşyrmak bilen baglylykda ulagyň ähli görnüşleriniň arabaglanyşygyny berkitmek» atly Kararnamalary, şeýle-de 26-njy noýabry «Bütindünýä durnukly ulag güni» diýip yglan etmek hakynda Kararnamany kabul edendigini bellemek gerek. 2025-nji ýylyň 15-nji dekabrynda bolsa «Birleşen Milletler Guramasynyň Durnukly ulag boýunça onýyllygy (2026 — 2035-nji ýyllar)» atly Kararnama kabul edildi. Bu resminama Türkmenistanyň ählumumy gün tertibiniň wajyp meselelerini çözmek üçin dünýä jemgyýetçiliginiň tagallalaryny birleşdirmäge gönükdirilen syýasatynyň logiki dowamydyr.

...Birnäçe wagtdan hormatly Prezidentimiziň uçary Türkmenabat şäheriniň Halkara howa menziline gelip gondy. Bu ýerde döwlet Baştutanymyz mähirli garşylanyldy. Welaýatyň sungat ussatlarynyň, döredijilik toparlarynyň ýerine ýetirmeginde joşgunly aýdym-sazlar ýaňlandy. Soňra Arkadagly Gahryman Serdarymyz dikuçarda ýokary tizlikli awtomobil ýolunyň açylyş dabarasynyň geçirilýän ýerine tarap ugrady. Biraz wagtdan döwlet Baştutanymyz dabaranyň geçirilýän ýerine geldi.

Hemmeler uly ruhubelentlik bilen hormatly Prezidentimiz Serdar Berdimuhamedowy mübärekleýärler. Bu ýerde medeniýet we sungat ussatlarynyň ýerine ýetirmeginde ata Watanymyzda durmuşa geçirilýän giň gerimli özgertmeleri wasp edýän aýdym-sazly çykyşlar ýaýbaňlandyryldy.

Soňra döwlet Baştutanymyz ýörite gurnalan mejlisler jaýyna bardy we bu ýerde çykyş etdi.

Hormatly Prezidentimiz hemmeleri mähirli mübärekläp, Garaşsyz ýurdumyzyň welaýatlaryny ösdürmek boýunça döwlet maksatnamalarynyň üstünlikli durmuşa geçirilýändigini, şu gün bolsa Türkmenistany durmuş-ykdysady taýdan ösdürmegiň çäklerinde Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylýandygyny belledi hem-de hemmeleri bu şatlykly waka bilen tüýs ýürekden gutlady. Nygtalyşy ýaly, ata-babalarymyz bize ýol çekmek, köpri gurmak ýaly asylly däpleri miras goýupdyrlar. Ýurdumyzyň ýol-ulag ulgamynda häzirki wagtda bu asylly işler mynasyp dowam etdirilýär. Örän iri, möhüm ähmiýetli taslamalar üstünlikli durmuşa geçirilýär. Gündogar — Günbatar, Demirgazyk — Günorta ugurlarda ýol-ulag ulgamlary has-da giňeldilýär. Döwletleri, halklary we sebitleri birleşdirjek ýol-ulag ulgamyny döwrebaplaşdyrmaga, häzirki zaman täze awtomobil ýollaryny yzygiderli gurmaga aýratyn ähmiýet berilýär. Häzirki döwürde Bitarap döwletimiz ulag diplomatiýasyny yzygiderli ösdürip, bu ugurda halkara bileleşik, goňşy we hyzmatdaş ýurtlar bilen netijeli gatnaşyklary ýola goýýar. Ulag ulgamynda bilelikdäki iri taslamalary amala aşyrmaga işjeň gatnaşýar, möhüm halkara başlangyçlary öňe sürýär.

“Birleşen Milletler Guramasynyň yglan eden Durnukly ulag boýunça onýyllygynyň ilkinji ýylynda şeýle iri taslamalaryň durmuşa geçirilmegi bedew batly ösüşlerimize şaýatlyk edýär. Irki döwürlerde yklymlary birleşdiren Beýik Ýüpek ýolunyň möhüm bölegi ýurdumyzyň üstünden geçipdir. Häzirki döwürde biz bu ýoly döwrebap görnüşde dikeltmek ugrunda ähli tagallalary edýäris. Aşgabat — Türkmenabat ýokary tizlikli awtomobil ýolunyň gurulmagy hem bu ugurda örän möhüm ähmiýete eýedir” diýip, hormatly Prezidentimiz aýtdy we 2019-njy ýylyň başynda Gahryman Arkadagymyz tarapyndan Aşgabat — Türkmenabat ýokary tizlikli awtomobil ýolunyň gurluşygyna badalga berlendigini belledi.

Umumy uzynlygy 600 kilometre deň bolan bu ýoluň Aşgabat — Tejen, Tejen — Mary aralygyndaky iki tapgyry ulanmaga berildi. Bu gün bolsa bu ýokary tizlikli ýoluň gurluşygy doly tamamlandy. Döwrebap ýoluň gurluşygy Senagatçylar we telekeçiler birleşmesiniň agzalary tarapyndan ýerine ýetirildi. Halkara derejeli bu awtomobil ýoly 6 sany hereket zolagyndan ybaratdyr. Ol dünýä ölçegleriniň talaplaryna doly laýyk gelýär.

Täze ýoluň geçýän ugrunda ýolagçylar, sürüjiler üçin ähli mümkinçilikler döredildi. Ýoluň hereket howpsuzlygyny üpjün etmek üçin halkara standartlara laýyk gelýän köp sanly köprüler, suw geçirijiler, ýörite geçelgeler, ýangyç guýujy beketler bina edildi. Ulag serişdelerine hyzmat ediş, gözegçilik we dolandyryş ulgamlary göz öňünde tutuldy.

“Ahal, Mary hem-de Lebap welaýatlaryny ýurdumyzyň paýtagty bilen birleşdirýän bu ýokary tizlikli awtomobil ýoly ýolagçylaryň we ýükleriň örän gysga wagtda gatnadylmagyny üpjün eder. Diýarymyzyň ulag ulgamynyň geçirijilik ukyby, logistik hyzmatlaryň hili ep-esli ýokarlanar. Ol sebitleriň ösmegine, ýurdumyzyň ykdysady kuwwatynyň has-da artmagyna güýçli itergi berer” diýip, döwlet Baştutanymyz aýtdy we onuň Beýik Ýüpek ýolunyň ugrundaky goňşy döwletlerimiz bilen söwda-ykdysady, medeni-ynsanperwer gatnaşyklary has-da ösdürmäge ýardam berjekdigine berk ynam bildirdi.

Hormatly Prezidentimiz «Garaşsyz, baky Bitarap Türkmenistan — bedew batly at-myradyň mekany» ýylynyň rowaçlyklara beslenýän günlerinde Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyp ulanmaga berilmegi bilen ýene-de bir gezek tüýs ýürekden gutlap, hemmelere berk jan saglyk, maşgala abadançylygyny, alyp barýan işlerinde uly üstünlikleri arzuw etdi.

Bu ýerde görkezilen wideoşekil arkaly ýokary tizlikli awtomobil ýolunyň Mary — Türkmenabat böleginiň gurluşygy hakynda giňişleýin maglumat berildi. Soňra dabara gatnaşýan abraýly halkara düzümleriň wekillerine söz berildi.

Ilki bilen, Fransiýanyň «Grenobloise d’Elektronique et d’Automatismes» kompaniýasynyň täjirçilik we marketing boýunça direktory Luis Felipe Duke Willegas çykyş etdi. Ol döwlet Baştutanymyzy Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylmagy mynasybetli tüýs ýürekden gutlady hem-de bu taslamanyň durmuşa geçirilmeginiň ähmiýetini belledi. “Biz Türkmenistan bilen hyzmatdaşlyga ýokary baha berýäris we bu taslamanyň ýurduň döwrebap infrastrukturasynyň ösdürilmegine goşant goşjakdygyna ynanýarys” diýip, işewür belledi hem-de «Grenobloise d’Elektronique et d’Automatismes» kompaniýasynyň Türkmenistan bilen geljekki infrastruktura taslamalary boýunça hyzmatdaşlyk etmäge taýýardygyny tassyklady.

Soňra Luis Felipe Duke Willegas bu möhüm taslamanyň wideogözegçilik we töleg ulgamlarynyň ýokary halkara hil standartlaryna laýyk gelýändigini tassyklaýan güwänamany; töleg ulgamlarynyň taslamalaşdyrylyşy, ulanylyşy we tehniki hyzmaty boýunça işleriň ýokary hilli dolandyryş ýörelgelerine laýyklykda alnyp barlandygyny tassyklaýan ISO 9001 şahadatnamasyny; maglumat howpsuzlygynyň ýokary derejesini, ulanyjylaryň şahsy maglumatlarynyň, maliýe amallarynyň we möhüm infrastrukturanyň kiberhowplardan ygtybarly goralýandygyny tassyklaýan ISO 27001 şahadatnamasyny; ýokary tizlikli awtomobil ýolunda daşky gurşawy goramak boýunça jogapkärli çemeleşmäni tassyklaýan we ähli işleriň gurşawa ýetirýän täsirini azaltmaga gönükdirilendigini tassyklaýan ISO 14001 şahadatnamasyny; ölçeg enjamlarynyň ýokary takyklygyny, gözegçilik ulgamlarynyň dogry işleýändigini, ähli amallaryň aýanlygynyň we adalatlylygynyň üpjün edilýändigini tassyklaýan ISO 10012 şahadatnamasyny gowşurdy. Sözüniň ahyrynda Luis Felipe Duke Willegas hormatly Prezidentimizi we ähli türkmen halkyny bu taryhy waka bilen ýene-de bir gezek tüýs ýürekden gutlady.

Soňra Hytaý Halk Respublikasynyň «Shandong Jiangfeng New Material Technology Co., Ltd.» kompaniýasynyň wekili Dong Guosen çykyş etdi. Ol hormatly Prezidentimizi we dabara gatnaşyjylary Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylmagy mynasybetli tüýs ýürekden gutlady hem-de bu ýerde «Shandong Jiangfeng New Material Technology Co., Ltd.» kompaniýasynyň adyndan çykyş etmegiň özi üçin uly hormatdygyny aýtdy.

Dong Guosen bu taslamanyň ýurdumyzyň ýol infrastrukturasynyň howpsuzlygyna we durnuklylygyna saldamly goşant goşjakdygyna ynam bildirip, «Shandong Jiangfeng New Material Technology» kompaniýasynyň Türkmenistan bilen geljekki infrastruktura taslamalary boýunça hyzmatdaşlyk etmäge taýýardygyny tassyklady hem-de ýokary tizlikli awtomobil ýolunyň ýol demir germewleriniň taslamasynyň we hasaplamalarynyň halkara ýol howpsuzlyk kadalaryna doly laýyk gelýändigini tassyklaýan güwänamany gowşurdy. Onuň gurluşygynda ulanylan inženerçilik çözgütleri we materiallaryň berkligi, çeýeligi, uzak möhletliligi iň ýokary halkara standartlara laýyk gelýär hem-de ISO 1461, EN1317 Ýewropa standartynyň halkara ýol howpsuzlygy kadalaryna gabat gelýär. Çykyşynyň ahyrynda Dong Guosen bu möhüm taslamanyň üstünlikli durmuşa geçirilmegi bilen hormatly Prezidentimizi we türkmen halkyny tüýs ýürekden gutlady.

Açylyş dabarasynyň öňüsyrasynda hormatly Prezidentimiz il sylagly ýaşulular bilen söhbetdeş bolup, olar bilen hal-ahwal soraşdy.

Soňra döwlet Baştutanymyz ýygnananlaryň şowhunly el çarpyşmalary astynda dabaraly ýagdaýda toý bagyny kesdi.

Aşgabat — Türkmenabat ýokary tizlikli awtomobil ýolunyň Mary — Türkmenabat bölegi 6 sany hereket zolagyndan ybaratdyr. Onuň ýer düşeginiň giňligi 34,5 metr, ýol hereket böleginiň giňligi her tarapda 11,25 metr, her hereket zolagynyň giňligi bolsa 3,75 metrdir. Täze awtobanyň ýol örtügi birinji derejeli döwrebap serişdelerden — ýokary hilli asfalt-betondan, sintetik örtükden, torlardan, ýoluň netijeli gatlarynyň mäkämligini artdyrýan beýleki serişdelerden ybarat bolup, olar ýol örtüginiň, köp gatly ýer düşeginiň göterijilik ukybyny artdyrmak üçin ulanylýar. Onuň ugrunda awtoduralgalar, sürüjilerdir ýolagçylara niýetlenen dynç alyş ýerleri, ýangyç guýujy beketler, beýleki desgalar guruldy. Awtomobil ýolunyň ugrunda gözegçilik enjamlary bilen üpjün edilen ýol hereketine gözegçiligi amala aşyrýan gullugyň, tehniki we ýol hyzmat gulluklarynyň nokatlary göz öňünde tutulandyr. Ýol hereketi, ulag akymy barada ähli maglumatlary toplaýan, ýatda saklaýan, ýol gözegçilik gullugyna geçirýän üznüksiz ýörite wideogözegçilik ulgamy arkaly dolandyrylýar.

Aşgabat — Türkmenabat ýokary tizlikli awtomobil ýolunyň Mary — Türkmenabat bölegi açylandan soňra, hormatly Prezidentimiz Serdar Berdimuhamedow awtomobilleriň hereketine ak pata berdi we awtoulagda awtobanyň ugry bilen ýola düşdi. Ýolugra döwlet Baştutanymyzy dabara gatnaşyjylar mähirli mübäreklediler. Ýokary tizlikli täze awtomobil ýolunyň ugrunda ýurdumyzyň döredijilik toparlarynyň ýerine ýetirmeginde aýdym-sazly çykyşlar ýaýbaňlandyryldy.

Berkarar döwletiň täze eýýamynyň Galkynyşy döwründe awtomobil ýollarynyň gurluşygyna degişli iri taslamany amala aşyrmak ugrunda ýerine ýetirilen işler esasynda hormatly Prezidentimiziň ak pata bermegi bilen ulanyşa girizilen Aşgabat — Türkmenabat ýokary tizlikli awtomobil ýolunyň Mary — Türkmenabat bölegi boýunça awtoulaglaryň, şol sanda agyr ýükleri daşaýjy ulaglaryň hereketi başlandy. Şeýle hem bu ýerden baýramçylyk ruhunda bezelen gelnalyjy kerweni geçdi.

Gahryman Arkadagymyzyň asylly başlangyçlary esasynda, hormatly Prezidentimiziň baştutanlygynda gözbaşyny asyrlaryň jümmüşinden alyp gaýdýan milli mirasymyz we däp-dessurlarymyz döwrüň ruhuna laýyklykda baýlaşdyrylyp, häzirki döwürde ýurdumyzda geçirilýän dabaralar baýramçylyk çäreleri bilen utgaşdyrylýar. Bu bolsa olara aýratyn öwüşgin çaýyp, halkymyzyň täze taryhy döwürde aýratyn many-mazmuna eýe bolýan baý medeni mirasyna, asylly däplerine üýtgewsiz ygrarlydygyny alamatlandyrýar. Gaýtalanmajak maddy we maddy däl gymmatlyklarymyz halkymyzyň taryhy, medeni tejribesini şöhlelendirip, ata-babalarymyzyň dünýä medeniýetiniň ösüşine ägirt uly goşant goşandygyna şaýatlyk edýär.

Döwlet Baştutanymyz ýokary tizlikli awtomobil ýolunyň Mary — Türkmenabat böleginiň ugrunda guralan dabara meýdançasynda toý däp-dessurlarymyzy we milli mirasymyzy açyp görkezýän edebi çykyşlary synlady. Hatara düzülen ak öýleriň ýanynda gazanlar atarylyp, olarda milli tagamlar taýýarlanylýar.

Bu ýerde halkymyzyň ýakyn syrdaşy bolan ahalteke bedewlerine aýratyn orun berlipdir. Türkmen halky baý medeni mirasyň eýesidir. Şolaryň arasynda şan-şöhraty dünýä dolan ahalteke bedewleri hem-de milli atşynaslyk sungaty mynasyp orny eýeleýär. Pederlerimiz tarapyndan asyrlaryň dowamynda kemala getirilip, umumadamzat gymmatlygyna öwrülen behişdi bedewlerimiz Ýer ýüzünde bar bolan tohum atlaryň arasynda naýbaşylaryň biri hasaplanýar. Gahryman Arkadagymyzyň behişdi bedewleriň şan-şöhratyny artdyrmak babatda başyny başlan asylly işleri hormatly Prezidentimiziň baştutanlygynda mynasyp dowam etdirilýär.

Şeýle-de bu ýerde halk senetçiliginiň dürli görnüşleri, ussat senetçileriň el işleri, halkymyzyň medeniýetini beýan edýän gymmatlyklar, amaly-haşam we şekillendiriş sungatynyň eserleri görkezilýär. Göreş tutulyp, milli oýunlar oýnalýar. Bularyň ählisi aýdym-sazlaryň owazy, şatlykly gülki sesleri bilen utgaşýar. Halk we toý aýdymlary, läleler ýerine ýetirilýär.

Diýarymyzda halkara hem-de döwlet ähmiýetli ýollaryň gurluşygy bilen birlikde, welaýatara, etrabara derejedäki ýollaryň gurluşygy boýunça giň möçberli işler yzygiderli alnyp barylýar. Munuň özi ähli sebitlerde täze iş orunlarynyň müňlerçesini döretmäge, welaýatlaryň arasyndaky ulag aragatnaşygyny döwrebaplaşdyrmaga, ýol hereketiniň howpsuzlygyny berkitmäge, Türkmenistanyň çäginden daşary ýurtlaryň awtoulag serişdeleriniň üstaşyr geçýän hereketini artdyrmaga mümkinçilik berýär. Bularyň ählisi Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda yklymyň möhüm söwda ýollarynyň çatrygynda ýerleşýän Türkmenistany iri halkara üstaşyr geçiriji döwlete öwürmek babatda durmuşa geçirilýän işleriň aýdyň netijesidir.

Dabarada Ministrler Kabinetiniň agzalary bu günki möhüm waka bilen hormatly Prezidentimizi hem-de Gahryman Arkadagymyzy tüýs ýürekden gutladylar. Bellenilişi ýaly, bu iri taslama ata-babalarymyzyň köpri gurmak, ýol çekmek ýaly asylly däpleriniň häzirki döwürde üstünlikli ilerledilýändiginiň aýdyň mysalydyr.

Döwlet Baştutanymyz gutlaglar üçin minnetdarlyk bildirip, ýurdumyzyň ýol-ulag düzüminiň iri taslamasy bolan Aşgabat — Türkmenabat ýokary tizlikli awtomobil ýolunyň möhüm ähmiýetini belledi hem-de döwrebap ýoluň açylmagy bilen hemmeleri gutlady.

Dabara tamamlanandan soňra, Arkadagly Gahryman Serdarymyz Aşgabat — Türkmenabat ýokary tizlikli awtomobil ýolunyň Mary — Türkmenabat böleginiň açylyş dabarasyna gatnaşyjylar bilen mähirli hoşlaşyp, dikuçarda Türkmenabat şäheriniň Halkara howa menziline ugrady. Ol ýerden hormatly Prezidentimiziň uçary paýtagtymyza tarap ugur aldy.

Biraz wagtdan döwlet Baştutanymyzyň uçary Aşgabadyň Halkara howa menziline gelip gondy. Bu ýerde hormatly Prezidentimizi ýurdumyzyň resmi adamlary garşyladylar.

Şeýlelikde, şu günki dabara ýurdumyzda içerki we halkara ulag arabaglanyşygy üçin ähli şertleriň döredilýändiginiň, Beýik Ýüpek ýolunyň döwrebap görnüşde gaýtadan dikeldilmegi ugrunda tutumly başlangyçlaryň durmuşa geçirilýändiginiň nobatdaky aýdyň güwäsi boldy. Munuň özi Diýarymyzyň çäginden geçýän üstaşyr awtoulag akymlarynyň artmagynyň hasabyna milli ykdysadyýetimizi ösdürmek bilen bir hatarda, sebitiň ýurtlarynyň durnukly ösüşine hem goşant goşar.

***

Şu gün ýokary tizlikli awtomobil ýolunyň Mary — Türkmenabat böleginiň açylyş dabarasy mynasybetli toý sadakasy berildi.

«Şabat» türkmen-özbek serhetýaka söwda merkezinde söwda dolanyşygy ýokarlanýar

Thu, 09 Apr 2026 21:31:40 +0500

«Şabat» türkmen-özbek serhetýaka söwda merkeziniň üsti bilen amala aşyrylýan söwda dolanşygynyň möçberleri yzygiderli artýar. Bu söwda merkezinde şu ýylyň ýanwar-mart aýlarynda 60 müňe golaý goňşy Özbegistan Respublikasynyň raýatlary tarapyndan amala aşyrylan söwdanyň netijesinde 1 700 tonnadan gowrak harytlar ýurdumyzdan eksport edildi. Şeýle hem, bu döwürde söwda merkeziniň özbek tarapyndan ýurdumyza 250 tonnadan gowrak harytlar import edildi.

Söwda merkezinde ýurdumyzda öndürilen alkogolsyz içgilere, konditer önümlerine, ter pomidora, bulardan başga-da ýuwujy serişdelere, dokma önümlere hem-de halkyň sarp edýän beýleki harytlaryna has köp isleg bildirilýär. Şeýle hem, söwda merkeziniň özbek tarapyndan ýurdumyza esasan Özbegistanda öndürilen hojalyk harytlar, gury ir-iýmişler we dokma önümleri getirilýär.

Ýeri gelende belläp geçsek, «Şabat» türkmen-özbek serhetýaka söwda merkezi 2025-nji ýylyň noýabr aýynda işe girizildi. Bu söwda merkeziniň üsti bilen amala aşyrylýan söwda dolanşygy ähli gümrük paçlardan we beýleki töleglerden boşadylan.

Türkmenistanyň Döwlet gümrük gullugynyň ýanyndaky Okuw merkezinde sanly ulgam arkaly okuw sapagy geçirildi

Sat, 28 Mar 2026 10:29:02 +0500

2026-njy ýylyň 26-njy martynda Türkmenistanyň Döwlet gümrük gullugynyň ýanyndaky Okuw merkezi bilen Özbegistan Respublikasynyň Döwlet gümrük komitetiniň Gümrük institutynyň arasynda wideoaragatnaşyk ulgamy arkaly bilelikdäki okuw maslahaty geçirildi. Bu okuw maslahaty Türkmenistanyň Döwlet gümrük gullugy bilen Özbegistan Respublikasynyň Döwlet gümrük komitetiniň arasynda Işgärleri taýýarlamak çygrynda özara düşünişmek hakynda gol çekilen Ähtnamanyň çäklerinde gurnaldy.

Bilelikdäki okuwyň dowamynda, gümrük işinde giňden ulanylýan Ygtyýarly ykdysady operatorlar ulgamy boýunça tejribeleri paýlaşdylar. Bu ulgamyň halkara söwdany ösdürmekde we gümrük serhedinden geçirilýän harytlara hem-de ulag serişdelerine ygtybarly gözegçiligi alyp barmakda döredýän giň mümkinçiligi barada pikir alyşdylar.

Ýeri gelende bellesek, Türkmenistanyň Döwlet gümrük gullugynyň ýanyndaky Okuw merkezine Bütindünýä gümrük guramasynyň sebitleýin okuw merkezi derejesi berildi. Bu bolsa, gümrük işi boýunça hünärmenleri taýýarlamakda we olaryň hünär bilimlerini ýokarlandyrmakda sebit ýurtlaryň gümrük işi babatynda okuw merkezleri bilen hyzmatdaşlygy has-da işjeňleşdirmäge giň mümkinçilik döretdi.

Okuw maslahatynyň ahyrynda, gümrük ulgamynda işgärleriň hünär taýýarlygyny ýokarlandyrmakda we öňdebaryjy halkara tejribelerini öwrenmekde bilelikdäki çäreleriň ähmiýeti barada bellenildi.

Türkmenistanyň Döwlet gümrük gullugynyň wekilleri Tokio şäherinde geçirilen halkara okuw çäresine gatnaşdylar

Fri, 13 Mar 2026 16:18:37 +0500

Türkmenistanyň Döwlet gümrük gullugynyň wekilleri Merkezi Aziýa we Kawkaz sebitinde howpsuzlygy üpjün etmek boýunça Taslamanyň (CCASP) çäklerinde geçirilen jemleýji sebitleýin okuw çäresine gatnaşdy. Çäre, 2026-njy ýylyň 3–5-nji martynda Ýaponiýanyň Tokio şäherinde geçirildi.

Ýaponiýanyň Hökümetiniň goldaw bermeginde Bütindünýä gümrük guramasy tarapyndan guralan bu taslama ok-därili ýaraglaryň we ýeňil ýaraglaryň (SALW), şeýle hem uçarmansyz uçýan enjamlaryň (PUA) bikanun serhetüsti geçirilmegine garşy göreş meselelerine bagyşlandy.

Türkmenistan bu taslamanyň işjeň gatnaşyjysy bolup durýar. Türkmenistanyň Döwlet gümrük gullugynyň wekilleri ozal 2025-nji ýylyň iýul aýynda Astana şäherinde geçirilen sebitleýin duşuşyga, şeýle hem 2026-njy ýylyň ýanwar aýynda Baku şäherinde geçirilen ikitaraplaýyn türgenleşik okuwyna gatnaşdylar.

Üç gün dowam eden okuwyň dowamynda sebitdäki ýurtlaryň — Ermenistanyň, Azerbaýjanyň, Gruziýanyň, Gazagystanyň, Gyrgyzystanyň, Täjigistanyň, Türkmenistanyň we Özbegistanyň gümrük edaralarynyň wekilleri geçirilen okuw çäreleriniň netijelerini jemlediler, milli tejribeleri bilen paýlaşdylar hem-de Ýaponiýanyň gümrük gullugy tarapyndan ulanylýan serhet we gümrük gözegçiliginiň öňdebaryjy usullary bilen tanyşdylar.

Türkmenistanyň wekiliýeti hem öz çykyşynda milli gümrük ulgamyny döwrebaplaşdyrmak boýunça alnyp barylýan işler barada gürrüň berdi. Hususan-da, töwekgelçilikleri awtomatlaşdyrylan tertipde seljermäge mümkinçilik berýän we gümrük gözegçiliginiň netijeliligini ýokarlandyrmaga hem-de gümrük resmileşdiriş amallaryny çaltlandyrmaga ýardam edýän Gözegçilik-seljeriş merkeziniň işi aýratyn nygtaldy. Şeýle hem gümrük nokatlaryny döwrebaplaşdyrmak boýunça alnyp barylýan işler, şol sanda häzirki zaman barlag-gözegçilik toplumlarynyň, wideogözegçilik ulgamlarynyň hem-de radiasion gözegçilik serişdeleriniň ornaşdyrylmagy barada bellenildi.

BGG-niň Sebitleýin okuw merkezleriniň wekilleri hyzmatdaşlygyň meselelerini ara alyp maslahatlaşdylar

Thu, 12 Mar 2026 19:01:44 +0500

2026-njy ýylyň 12-nji martynda Türkmenistanyň Döwlet gümrük gullugynyň ýanyndaky Okuw merkeziniň işgärleri wideoaragatnaşyk arkaly geçirilen Bütindünýä gümrük guramasynyň Ýewropa sebiti boýunça Sebitleýin okuw merkezleriniň iş duşuşygyna gatnaşdylar. Türkmenistanyň, Gazagystanyň, Azerbaýjanyň we Gyrgyzystanyň Bütindünýä gümrük guramasynyň Sebitleýin okuw merkezleriniň wekilleriniň gatnaşmagynda geçirilen bu iş duşuşygy özara tejribe alyşmaga, öňdebaryjy tejribeleri hem-de bilelikdäki başlangyçlary ara alyp maslahatlaşmaga gönükdirildi.

Duşuşygyň dowamynda Sebitleýin okuw merkezleriniň wekilleri geçirilýän okuw çäreleri barada giňişleýin maglumat berdiler. Şeýle hem Bütindünýä gümrük guramasynyň Sebitleýin mümkinçilikleri ösdürmek boýunça edarasy (WCO ROCB), Bütindünýä gümrük guramasy hem-de beýleki halkara guramalar bilen alnyp barylýan hyzmatdaşlygyň mysallary görkezildi.

Duşuşyga gatnaşyjylar okuw zerurlyklaryny kesgitlemek we seljermek boýunça öz tejribelerini paýlaşdylar. Mundan başga-da, 2026-njy ýyl üçin meýilnamalar, taýýarlygyň esasy ileri tutulýan ugurlary hem-de geçiriljek çäreler ara alnyp maslahatlaşyldy. Şeýle çemeleşme sebitleýin hyzmatdaşlygy berkitmäge we okuw maksatnamalarynyň hilini ýokarlandyrmaga ýardam eder diýip bellenildi.

Duşuşygyň çäklerinde 29–30-njy aprelde Aşgabat şäherinde geçirilmegi meýilleşdirilýän Sebitleýin okuw merkezleriniň duşuşygyna degişli meseleler hem ara alnyp maslahatlaşyldy. Bellenilişi ýaly, degişli taraplara öňünden iberilen çakylyklara laýyklykda geçiriljek bu duşuşygyň dowamynda sebitleýin okuw merkezleriniň arasynda geljekki hyzmatdaşlygyň meseleleri tegelek stoluň başynda ara alnyp maslahatlaşylar.

Ýeri gelende belläp geçsek, Türkmenistanyň Döwlet gümrük gullugynyň ýanyndaky Okuw Merkezi geçen ýylyň iýun aýynda resmi taýdan Bütindünýä gümrük guramasynyň Sebitleýin Okuw Merkezi hökmünde ykrar edildi we munuň özi halkara hyzmatdaşlygyny güýçlendirmek we hünärmenleri taýýarlamak derejesini ýokarlandyrmak üçin täze mümkinçilikleri açdy.

Türkmenistanyň Döwlet howpsuzlyk geňeşiniň mejlisi

Thu, 05 Mar 2026 12:28:47 +0500

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlisini geçirdi. Onda ýurdumyzyň harby we hukuk goraýjy edaralarynda şu ýylyň iki aýynda alnyp barlan işleriň netijelerine seredildi. Şeýle-de Garaşsyz döwletimizde howpsuzlygy, asudalygy üpjün etmäge, harby we hukuk goraýjy edaralaryň maddy-enjamlaýyn binýadyny berkitmäge, işini has-da kämilleşdirmäge degişli meseleleriň birnäçesi ara alnyp maslahatlaşyldy.

Ilki bilen, Döwlet howpsuzlyk geňeşiniň sekretary, goranmak ministri B.Gündogdyýew Türkmenistanyň Ýaragly Güýçlerini ösdürmegiň maksatnamasynda göz öňünde tutulan wezipeleri üstünlikli ýerine ýetirmek boýunça ýylyň başyndan bäri alnyp barlan işler barada hasabat berdi. Şeýle hem Watan goragçylarynyň gulluk, ýaşaýyş-durmuş şertlerini gowulandyrmak, serkerdeleriň hünär derejesini ýokarlandyrmak babatda amala aşyrylan işler barada aýdyldy.

Hormatly Prezidentimiz hasabaty diňläp, ýurdumyzyň Ýaragly Güýçlerini kämilleşdirmek boýunça maksatnamalaýyn işleri mundan beýläk-de dowam etdirmegiň, Milli goşunymyzy ösdürmäge gönükdirilen toplumlaýyn çäreleri amala aşyrmakda dünýäniň öňdebaryjy tejribelerini yzygiderli öwrenmegiň möhümdigini belledi hem-de Döwlet howpsuzlyk geňeşiniň sekretary, goranmak ministrine birnäçe anyk tabşyryklary berdi.

Baş prokuror B.Muhamedow milli kanunçylygyň berjaý edilişine gözegçilik etmek, bu ugurda sanly ulgamy işjeň ulanmak we prokuratura edaralarynyň işgärleriniň hünär derejesini ýokarlandyrmak maksady bilen, ýylyň başyndan bäri alnyp barlan işler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, kanunlaryň we hukuk namalarynyň takyk ýerine ýetirilişine prokuror gözegçiligini dowam edip, mundan beýläk-de kanunylygy pugtalandyrmagyň, raýatlaryň hukuklaryny üpjün etmek babatda netijeli işleri alyp barmagyň wajyp wezipe bolup durýandygyny aýtdy hem-de bu babatda Baş prokurora birnäçe görkezmeleri berdi.

Içeri işler ministri M.Hydyrow geçen iki aýda ýurdumyzda hukuk tertibini pugtalandyrmak, düzgün bozulmalaryň, ýol-ulag hadysalarynyň öňüni almak, ýangyn howpsuzlygynyň kadalaryny berjaý etmek boýunça görlen çäreler barada hasabat berdi.

Döwlet Baştutanymyz hasabaty diňläp, jemgyýetçilik tertibini üpjün etmek, hukuk bozulmalarynyň öňüni almak boýunça alnyp barylýan işleri netijeli dowam etdirmek babatda ministre birnäçe anyk tabşyryklary berdi.

Ýokary kazyýetiň başlygy B.Hojamgulyýew bu düzümi ösdürmegiň maksatnamasyny durmuşa geçirmegiň çäklerinde şu ýylyň iki aýynda ýerine ýetirilen işleriň netijeleri, kazyýet edaralaryna sanly ulgamyň ornaşdyrylyşy, kazyýet ulgamyny kämilleşdirmegiň barşy, döwlet Baştutanymyzyň ozal beren tabşyryklarynyň ýerine ýetirilişi barada hasabat berdi.

Hormatly Prezidentimiz hasabaty diňläp, ýurdumyzda kanunylygy üpjün etmek, döwlet we jemgyýetçilik bähbitlerini, raýatlaryň hukuklaryny goramak boýunça alnyp barylýan işleri netijeli dowam etdirmegiň, kazyýet edaralarynyň işiniň hilini has-da ýokarlandyrmagyň möhümdigine ünsi çekdi hem-de bu babatda anyk görkezmeleri berdi.

Soňra milli howpsuzlyk ministri D.Meredow şu ýylyň ýanwar-fewral aýlarynda ýerine ýetirilen işler, Watanymyzda parahatçylygy we asudalygy üpjün etmek boýunça görlen çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, döwletimiziň konstitusion gurluşyny, milli bähbitlerini goramak boýunça alnyp barylýan işleri netijeli dowam etdirmek, milli howpsuzlyk edaralarynyň işini yzygiderli kämilleşdirmek babatda birnäçe anyk tabşyryklary berdi.

Döwlet serhet gullugynyň başlygy I.Ilamanow geçen iki aýda Watanymyzyň mukaddes serhetleriniň ygtybarly goralmagyny üpjün etmek, serhet goşunlarynyň maddy-enjamlaýyn binýadyny pugtalandyrmak boýunça görlen çäreler, bu ugurda ýurdumyzyň Ýaragly Güýçleriniň Belent Serkerdebaşysynyň ozal beren tabşyryklarynyň ýerine ýetirilişi barada hasabat berdi.

Hormatly Prezidentimiz hasabaty diňläp, ýurdumyzyň döwlet serhediniň dost-doganlyk serhedi bolup durýandygyny belledi hem-de onuň goraglylygyny üpjün etmek, serhet goşunlarynyň işini kämilleşdirmek, onuň maddy-enjamlaýyn binýadyny berkitmek boýunça alnyp barylýan işleri netijeli dowam etdirmegi tabşyrdy.

Adalat ministri M.Taganow halkara tejribäni ornaşdyrmagyň hasabyna milli kanunçylyk işini kämilleşdirmek, işgärleriň hünär derejesini ýokarlandyrmak, bu düzüme sanly ulgamy ornaşdyrmak boýunça ýylyň başyndan bäri amala aşyrylan işler barada hasabat berdi.

Döwlet Baştutanymyz hasabaty diňläp, ýurdumyzda kanunçylyk ulgamyny kämilleşdirmek işlerini has netijeli dowam etdirmegiň, raýatlara kanunçylygy düşündirmek bilen bagly wagyz-nesihat işlerini geçirmegiň zerurdygyny aýtdy we bu babatda birnäçe anyk tabşyryklary berdi.

Döwlet gümrük gullugynyň başlygy M.Hudaýkulyýew ýolbaşçylyk edýän düzümlerinde şu ýylyň ýanwar-fewral aýlarynda alnyp barlan işleriň netijeleri, şol sanda sanly ulgamy, döwrebap tehnologiýalary ornaşdyrmagyň hasabyna işiň netijeliligini ýokarlandyrmak, gullugy ösdürmegiň maksatnamasyny durmuşa geçirmek boýunça görlen çäreler barada hasabat berdi.

Ýurdumyzyň Ýaragly Güýçleriniň Belent Serkerdebaşysy hasabaty diňläp, Türkmenistanyň gümrük nokatlarynda gümrük düzgünleriniň berjaý edilişine gözegçilik etmek boýunça alnyp barylýan işleri netijeli dowam etdirmegi tabşyrdy.

Döwlet migrasiýa gullugynyň başlygy A.Sazakow migrasiýa hyzmatlarynyň hilini ýokarlandyrmak, gullugyň maddy-enjamlaýyn binýadyny pugtalandyrmak, düzümi ösdürmegiň maksatnamasynda kesgitlenen wezipeleri üstünlikli ýerine ýetirmek maksady bilen, şu ýylyň iki aýynda amala aşyrylan işler barada hasabat berdi.

Hormatly Prezidentimiz hasabaty diňläp, migrasiýa edaralarynyň işini kämilleşdirmegi üns merkezinde saklamagyň, ýokary hilli migrasiýa hyzmatlaryny üpjün etmek boýunça işleri netijeli dowam etdirmegiň möhümdigini belledi hem-de bu babatda gullugyň ýolbaşçysyna anyk görkezmeleri berdi.

Hormatly Prezidentimiz mejlise gatnaşyjylara ýüzlenip, goranyş häsiýetli Harby doktrinamyzyň talaplaryna laýyklykda, Garaşsyz, hemişelik Bitarap döwletimiziň howpsuzlygyny we çäk bitewüligini ýokary derejede üpjün etmek, ýurdumyzyň goranmak ukybyny berkitmek, Watan goragçylarynyň we olaryň maşgala agzalarynyň ýaşaýyş-durmuş şertlerini has-da ýokarlandyrmak boýunça yzygiderli çäreleriň durmuşa geçirilýändigini aýtdy hem-de bu işleriň mundan beýläk-de dowam etdiriljekdigini belledi.

Döwlet howpsuzlyk geňeşiniň mejlisinde başga-da birnäçe möhüm meselelere garaldy we olar boýunça degişli çözgütler kabul edildi.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow mejlisi jemläp, oňa gatnaşanlara berk jan saglyk, halkymyzyň asuda hem-de bagtyýar durmuşda ýaşamagy ugrunda alyp barýan jogapkärli işlerinde uly üstünlikleri arzuw etdi.

Türkmen-eýran serhedindäki gözegçilik geçiriş ýerleriniň işi kadaly dowam edýär.

Thu, 05 Mar 2026 12:26:22 +0500

Häzirki wagtda «Sarahs», «Artyk», «Howdan» we «Altyn Asyr» gümrük nokatlaryndan ulaglaryň we ýükleriň geçirilmegi dowam edýär. Bu gümrük nokatlary ulag geçirijilik mümkinçiligine görä, doly kuwwatynda işleýär.

Şeýle hem, gümrük nokatlaryň çäklerinde ulaglaryň we ýükleriň çalt geçirilmegi hem-de nobatlaryň döremeginiň öňüni almak üçin işler ýokary derejede alnyp barylýar. Bu bolsa, ýurdumyzdan eksport edilýän ýa-da daşary döwletlerden getirilýän harytlaryň öz wagtynda alyjylary gowuşmagynda örän ähmiýetli bolup burýar.

Türkmen-eýran serhedindäki gümrük nokatlary ýükleriň üstaşyr geçirilmeginde hem ähmiýetli uly hasaplanylýar. Häzirki wagtda bu gümrük nokatlaryň üsti bilen Özbegistan, Täjigistan, Gyrgyzystan, Gazagystan we başga-da birnäçe ýurtlara uly möçberde harytlar daşalýar.

Ýurdumyzyň ulag üstaşyr mümkinçiliklerini ýokarlandyrmak üçin döredilýän amatly şertleriň netijesinde, üstaşyr geçirilýän ýükleriň möçberleri ýylsaýyn artýar.

Gümrük gullugynyň ýanyndaky Okuw merkeziniň wekilleri Bütindünýä gümrük guramasynyň 21-nji Global duşuşygyna gatnaşdy

Wed, 25 Feb 2026 14:27:43 +0500

2026-njy ýylyň 23-24-nji fewralynda Gümrük gullugynyň ýanyndaky Okuw merkeziniň wekilleri Bütindünýä gümrük guramasyna (BGG) agza döwletler tarapyndan döredilen sebitleýin edaralaryň we bu guramanyň Geňeşiniň başlygynyň orunbasarlarynyň edaralarynyň 21-nji global mejlisine wideoaragatnaşyk arkaly gatnaşdy.

Çäräniň dowamynda BGG-niň sebitleýin düzümleriniň häzirki işleri, sebitleýin okuw merkezleriniň arasynda iň gowy tejribeleriň alyş-çalşygy we gümrük edaralarynyň mümkinçiliklerini ösdürmegiň döwrebap çemeleşmeleri ara alnyp maslahatlaşyldy. Elektron okuwyň we sanly platformalaryň ornaşdyrylmagyna we uzak aralykdan okuwyň ulanylmagyna aýratyn üns berildi.

Duşuşyga gatnaşan Okuw Merkeziniň wekilleri BGG-niň täze mümkinçiliklerini artdyrmak başlangyçlary bilen tanyşdylar we alnan maglumatlar bilim maksatnamalaryny kämilleşdirmek we gümrük ulgamynda halkara hyzmatdaşlygyny ösdürmek boýunça mundan beýläk-de işlerde ulanylar.

Bildiriş: Gümrük işi hukuk meseleleri boýunça iş maslahaty geçirilýär

Mon, 23 Feb 2026 14:44:09 +0500

Türkmenistanyň Döwlet gümrük gullugynda daşary ykdysady işe gatnaşýan hususy taraplaryň hem-de logistik kompaniýalaryň wekilleriniň gatnaşmaklarynda, gümrük işi babatynda hukuk kömegini bermek maskady bilen iş maslahaty geçirilýär.

Iş maslahatynda, ýurdumyzdan eksport edilýän hem-de daşary döwletlerden ýurdumyza getirilýän harytlaryň hukuk esaslary we gümrük amallarynyň ýerine ýetirilişi, halkara ýük daşamalary üçin bildirilýän talaplar we işde ýüze çykýan soraglar boýunça hukuk kömegi berler.

Iş maslahaty Aşgabat şäheriniň çäginde ýerleşýän Halkara gümrük terminalynyň 1-nji gatyndaky ýygnaklar zalynda geçirilýär. Iş maslahaty 2026-njy ýylyň 27-nji fewralynda sagat 10:00-da başlaýar.

Iş maslahaty boýunça özüňizi gyzyklandyrýan goşmaça soraglar boýunça «Sorag-jogap» hyzmatynyň mümkinçiliginden peýdalanyp bilersiňiz. Telefon belgisi 39-41-39.

Türkmenistan üstaşyr we daşary söwda ýük daşamalarynyň möçberini artdyrýar

Thu, 19 Feb 2026 16:35:58 +0500

Soňky ýyllarda Türkmenistanyň daşary söwda ýük dolanşygynyň we üstaşyr geçirilen ýükleriň möçberi yzygiderli ýokarlanýar. 2025-nji ýylda Döwlet serhediniň gözegçilik-geçiriş ýerlerinde geçirilen ýükleriň möçberi 20 mln. tonna deň bolup, bu görkeziji 2019-njy ýyldan bäri iň ýokary görkezijidir.

Şunda, üstaşyr geçirilen ýükleriň möçberi 7 mln. tonnadan gowrak bolup, 2024-nji ýyla görä 28 % ýokarlandy. Geçen ýylda ýurdumyzyň çäginden 108 sany döwlete üstaşyr ýükler geçirildi.

Ýurdumyzyň daşary söwda we üstaşyr ýük daşamalaryň 43 % awtomobil ulaglary, 27 % demir ýol ulag serişdeleri, 28 % deňiz gämisi we 2 % howa gämisi arkaly daşaldy.

Türkmenistanyň Döwlet gümrük gullugy tarapyndan halkara ýük daşamalarynda ulag serişdeleriň we ýükleriň gümrük serhedinden çalt geçirilmegini üpjün etmek babatynda yzygiderli işleri durmuşa geçirýär.

Garaşsyz, hemişelik Bitarap Türkmenistanyň diplomatik işgärlerine

Wed, 18 Feb 2026 16:55:36 +0500

Türkmenistanyň diplomatik gullugynyň hormatly işgärleri!

Sizi Watanymyzda her ýyl giňden bellenilip geçilýän Türkmenistanyň diplomatik işgärleriniň güni mynasybetli tüýs ýürekden gutlaýaryn. «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilen ýylda hem döwletimiziň halkara abraýyny has-da ýokarlandyrmak üçin täze, belent sepgitler kesgitlenildi. Siziň sebit we halkara gatnaşyklarda syýasy-diplomatik, söwda-ykdysady, medeni-ynsanperwer ugurlar boýunça hyzmatdaşlygy hemmetaraplaýyn ösdürmäge mynasyp goşandyňyzy goşjakdygyňyza berk ynanýaryn.

Hormatly diplomatlar!

Türkmenistan Garaşsyzlygynyň ilkinji ädimlerinden başlap, halkara gatnaşyklarda we daşary syýasatda Bitaraplyk, deňhukuklylyk, hoşniýetli goňşuçylyk ýaly binýatlyk ýörelgeleri saýlap aldy. Geçen ýyllaryň dowamynda döwletimiziň daşary syýasaty Türkmenistanyň milli bähbitlerine we Birleşen Milletler Guramasynyň esas goýujy maksatlaryna doly laýyk gelýändigini iş ýüzünde subut etdi. Türkmenistanyň hemişelik Bitaraplygynyň Birleşen Milletler Guramasynyň Baş Assambleýasynyň degişli Kararnamalary bilen üç gezek ykrar edilmegi munuň aýdyň mysalydyr. Aşgabatda BMG-niň Merkezi Aziýa üçin öňüni alyş diplomatiýasy boýunça sebit merkeziniň açylmagy we onuň Türkmenistanyň Hökümeti bilen netijeli işlemegi hem Bitaraplygyň parahatçylyk dörediji güýjüniň aýratyn ähmiýetini giňden açyp görkezýär.

Ýurdumyzyň halkara ähmiýetli teklipleriniň we ählumumy häsiýete eýe bolan başlangyçlary esasynda Birleşen Milletler Guramasynyň Baş Assambleýasy tarapyndan parahatçylyk, howpsuzlyk we durnukly ösüş ulgamyndaky möhüm Kararnamalaryň uly toplumynyň kabul edilmegi döwletimiziň bu abraýly gurama bilen strategik hyzmatdaşlygynyň netijeli mazmuna eýedigini görkezýär. Birleşen Milletler Guramasynyň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem bu hakykaty doly tassyklaýar. Halkara Bitaraplyk gününe bagyşlanyp geçirilen ýokary derejeli halkara forumyň jemleri Türkmenistanyň dünýä jemgyýetçiligindäki abraýyny has-da artdyrdy, döwletimiziň parahatçylyk söýüjilikli taglymatyny ýene-de bir gezek äleme ýaýdy.

Berkarar döwletiň täze eýýamynyň Galkynyşy döwründe biz halkara borçnamalara hem-de halkara hukugyň ýörelgelerine berk we gyşarnyksyz eýerip, ýurdumyzyň geosyýasy hem-de geoykdysady mümkinçiliklerini parahat durmuşyň, döredijilikli ösüşiň, özara bähbitli hyzmatdaşlygyň hatyrasyna durmuşa geçirýäris. 2028-nji ýyly «Halkara hukugyň ýyly» diýip yglan etmek baradaky başlangyç bütin dünýäde parahatçylygyň diňe bir hukuk binýadyny däl, eýsem, onuň ruhy esaslaryny hem kämilleşdirýär. Bu ynsanperwer başlangyçlar halkara gatnaşyklarda özara hormat goýmak we adalatlylyk ýörelgelerini dabaralandyrmak bilen, ählumumy durnuklylygyň täze taryhy sahypasyny açýar.

Döwletimiziň daşary syýasatynyň strategik ugurlarynyň üstünlikli amala aşyrylmagy bilen birlikde, häzirki wagtda energetika, ulag-aragatnaşyk, ekologiýa, ýokary tehnologiýaly «ýaşyl» ykdysadyýet, medeni-ynsanperwer ulgam ýaly ähmiýetli ugurlarda iri halkara taslamalaryň durmuşa geçirilmegi babatda zerur şertler döredilýär. Hemişelik Bitarap döwletimiziň parahatçylyk hem-de ynanyşmak ýörelgelerine esaslanýan daşary syýasaty we diplomatiýasy uzak möhletleýin milli maksatnamalarymyzy amala aşyrmak üçin halkara giňişlikde zerur bolan ähmiýetli mümkinçilikleriň döredilmegine gönükdirilendir. Bu babatda döwletara we hökümetara derejede syýasy-diplomatik, halkara hukuk, söwda-ykdysady geňeşmeleriň netijeli gurallaryny işe girizmekde ýurdumyzyň diplomatik gullugyna uly talap bildirilýär.

Türkmenistan bu gün ösüşiň belent sepgitlerini nazarlap, nurana geljege tarap ynamly öňe barýar. Garaşsyz, hemişelik Bitarap döwletimiziň ata-babalarymyzyň ynsanperwer ýörelgelerine esaslanýan daşary syýasaty we diplomatiýasy milli maksatnamalarymyzy amala aşyrmak üçin halkara giňişlikde zerur şertleri döredýär. «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasyndan» ugur alyp, ýurdumyzyň diplomatik gullugynyň işgärleri daşary syýasatymyzda parahatçylygyň we howpsuzlygyň üpjün edilmegi arkaly halkara gatnaşyklary kämilleşdirmäge çagyrýan nusgalyk syýasatymyzyň geriminiň giňeldilmegine, Türkmenistanyň dünýä giňişligindäki abraýynyň has-da belende göterilmegine işjeň gatnaşýarlar. Ýurdumyzyň milli bähbitlerini hemmetaraplaýyn goramakda we halkara gatnaşyklar ulgamyndaky belent abraýyny artdyrmakda döwletimiziň diplomatik gullugynyň işgärleriniň öňünde goýlan möhüm wezipeleri ýokary derejede ýerine ýetirjekdiklerine berk ynanýaryn.

Türkmenistanyň diplomatik gullugynyň işgärleri!

Sizi hünär baýramyňyz bilen ýene-de bir gezek tüýs ýürekden gutlaýaryn. Size berk jan saglyk, abadançylyk, döwletimiziň dünýä derejesindäki abraýyny has-da artdyrmak ugrunda alyp barýan işleriňizde uly üstünlikleri arzuw edýärin.

Türkmenistanyň Prezidenti
Serdar Berdimuhamedow.

Türkmenistan 2025-nji ýylda azyk önümleriniň eksportyny artdyrdy

Tue, 17 Feb 2026 12:51:35 +0500

2025-nji ýylda Türkmenistandan eksport edilýän azyk önümleriniň möçberi 30 % ýokarlandy. Bu döwürde ýurdumyzdan 263 müň tonnadan gowrak azyk önümleri eksport edildi.

Häzirki wagtda Türkmenistan ýyladyşhanalarda ýetişdirilýän pomidory eksport etmek boýunça sebitde öňdäki orunda durýar. Şoňa görä-de, geçen ýylda 181 müň tonnadan gowrak ter pomidor eksport edilip, bu görkeziji 2024-nji ýyla görä 21 % ýokarlandy.

Bulardan başga-da, 2025-nji ýylda gök önümleriniň we ter miweleriň eksporty 5 %, gaplanan azyk önümleriniň eksporty 3 %, konditer önümleriniň eksporty 123%, alkogolsyz içleriň eksporty 282,6 % ýokarlandy. Şeýle hem, geçen ýylda 6 müň tonna golaý iýmitlik towuk ýumurtgasy we 26 müň tonna golaý azyklyk däneli ekinler eksport edildi.

Türkmenistanyň Döwlet gümrük gullugy Döwlet serhediniň gözegçilik-geçiriş ýerlerinde ýurdumyzdan eksport edilýän azyk önümleri ileri tutma tertibinde resmileşdirmek işlerini amala aşyrýar. Bu bolsa, azyk önümleriniň ahyrky sarp edijilere gysga wagtda we bökdençsiz daşalmagynda ähmiýetli bolup durýar.

Şeýle hem, Döwlet Gümrük gullugy hususy önüm öndürijiler bilen yzygiderli iş duşuşyklaryny geçirip, gümrük kanunçylygy we olara girizilýän üýtgetmeler hem-de goşmaçalar, daşary ykdysady işine gatnaşyjylar üçin döwrüň ösýän talaplaryna laýyk gelýän hyzmatlaryň täze görnüşleri barada hukuk kömegini berýärler.

Döwlet gümrük gullugynyň wekilleri Astanada geçirilen Harytlary goýbermegiň wagtyny öwrenmek boýunça sebitleýin okuwa gatnaşdylar

Mon, 16 Feb 2026 21:02:49 +0500

2026-njy ýylyň 10-12-nji fewraly aralygynda Türkmenistanyň Döwlet gümrük gullugyndan iki sany wekil Astanada geçirilen Bütindünýä gümrük guramasynyň (WCO) we Ýaponiýanyň Halkara Hyzmatdaşlyk Agentliginiň (JICA) Merkezi Aziýa we Kawkaz ýurtlary üçin Harytlary goýbermegiň wagty (TRS) boýunça bilelikdäki ikinji sebitleýin okuwa gatnaşdy.

Bu çäre, Bütindünýä gümrük guramasynyň (WCO) we Ýaponiýanyň Halkara Hyzmatdaşlyk Agentliginiň Gazagystan Respublikasynyň Maliýe ministrliginiň Döwlet girdejiler komiteti bilen hyzmatdaşlykda gurnaldy.

Okuw çäresine Ermenistanyň, Azerbaýjanyň, Gruziýanyň, Gazagystanyň, Gyrgyzystanyň, Täjigistanyň, Türkmenistanyň we Özbegistanyň gümrük edaralarynyň wekilleri, şeýle hem WCO we JICA bilermenleri gatnaşdylar.

Okuwda TRS-iň ornaşdyrylmagy, iň gowy tejribeleriň alyş-çalşygy, gümrük amallaryndaky päsgelçilikleriň ýüze çykarylmagy we import, eksport we üstaşyr amallaryny kämilleşdirmek üçin milli we sebitleýin teklipleriň işlenip düzülmegi ýaly meseleler ara alnyp maslahatlaşyldy.

Türkmenistanyň Döwlet gümrük gullugynda Konteýnerli daşamalara gözegçilik etmek boýunça Maksatnamasynyň çäginde utgaşdyryjy duşuşyk geçirildi

Fri, 13 Feb 2026 16:25:52 +0500

2026-njy ýylyň 11-nji fewralynda Türkmenistanyň Döwlet gümrük gullugynyň Merkezi edarasynda Birleşen Milletler Guramasynyň Neşe serişdeleri we jenaýatçylyk boýunça müdirliginiň ýolagçy we ýük gatnawlaryna gözegçilik etmek boýunça Ählumumy maksatnamasynyň çäginde milli utgaşdyryjy duşuşyk geçirildi.

Duşuşyk Türkmenistanyň Daşary işler ministrliginiň goldawy bilen guraldy. Çäräniň esasy maksady 2025-nji ýylda Maksatnamanyň Türkmenistanda ýerine ýetirilişiniň barşyny ara alyp maslahatlaşmak, milli edaralaryň ileri tutulýan zerurlyklaryny kesgitlemek, şeýle hem 2026-njy ýylyň birinji ýarymy üçin hyzmatdaşlygyň meýilnamalaryny ylalaşmakdan ybarat boldy.

Türkmenistanyň Döwlet gümrük gullugynyň wekiliýetine Gullugyň Başlygynyň orunbasary ýolbaşçylyk etdi. BMG-niň Neşe serişdeleri we jenaýatçylyk boýunça müdirliginden duşuşyga Maksatnamanyň sebit boýunça utgaşdyryjysy jenap Sardor Ataşikow gatnaşdy.

Gepleşikleriň dowamynda taraplar ýolagçy we ýük gatnawlaryna gözegçilik etmek ulgamynda pudagara hyzmatdaşlygy mundan beýläk-de berkitmegiň möhümdigini nygtadylar, Maksatnamanyň durmuşa geçirilişiniň amaly taraplary boýunça pikir alyşdylar, şeýle hem geljek döwür üçin hyzmatdaşlygyň ileri tutulýan ugurlaryny kesgitlediler.

Türkmenistanyň Döwlet gümrük gullugynda iş maslahaty geçirildi

Thu, 05 Feb 2026 17:01:25 +0500

2026-njy ýylyň 4-nji fewralynda geçirilen bu maslahatyň barşynda, Türkmenistanyň gümrük serhedinden geçirilýän demir ýol ulagynda ýük daşamalarynda gümrük taýdan resmileşdirmesi üçin sarp edilýän wagty azaltmak meseleleri ara alnyp maslahatlaşyldy.

Çärä, gözegçilik-geçiriş ýerlerinde iş alyp barýan ygtyýarly edaralar bolan gümrük, serhet, weterinar, karantin gulluklarynyň hem-de Türkmenistanyň Demir ýol ulaglary ministrliginiň hünärmenleri gatnaşdylar. Maslahatda, demir ýol ulaglary arkaly ýük daşamalaryň möçberiniň artýan şertlerinde, serhet geçelgelerinde gümrük taýdan resmileşdirmek işleriniň hilini ýokarlandyrmak, gulluklaryň arasynda resminama dolanşygyny kämilleşdirmek we sanly ulgamyň mümkinçiliklerini giňden ulanmak arkaly, sarp edilýän wagty tygşytlamak bellenildi.

Ýeri gelende belläp geçsek, 2026-njy ýylyň ýanwar aýynda gözegçilik-geçiriş ýerleriniň üsti bilen demir ýol ulaglarynda daşalýan ýükleriň möçberi geçen ýylyň degişli döwrüne görä 20 % ýokarlandy.

Türkmenistanyň Döwlet gümrük gullugynda onlaýn sorag-jogap hyzmaty ýola goýuldy

Thu, 05 Feb 2026 11:41:48 +0500

Ýurdumyzda gümrük işini döwrüň ösýän talaplaryna laýyklykda kämilleşdirmek, daşary ykdysady işiň ösmegine ýardam berýän şertleri döretmek boýunça Türkmenistanyň Döwlet gümrük gullugy tarapyndan alnyp barylýan işleriň çäklerinde, telefon arkaly, onlaýn sorag-jogap hyzmaty ýola goýuldy.

Bu hyzmatyň ýola goýulmagy bilen, daşary ykdysady işine, şol sanda daşary söwda işine gatnaşýan şahslaryň, gümrük serhedinden geçýän ýa-da geçmegi meýilleşdirýän raýatlaryň gümrük işi babatdaky soraglaryna şol wagt, onlaýn görnüşde jogap berilmegine mümkinçilik döredilýär.

Türkmenistanyň Döwlet gümrük gullugynyň bu onlaýn hyzmaty, harytlar gümrük serhedinden geçirilende amala aşyrylýan gümrük amallary, şol sanda gümrük taýdan resmileşdirmek, tölenilýän gümrük tölegleri, Türkmenistanyň kanunçylygynda bellenilen gadaganlyklar we çäklendirmeler barada döreýän soraglara jogap bermekden ybaratdyr.

Şol sanda, sorag-jogap hyzmatynyň üsti bilen, Türkmenistanyň çägine getirilýän awtoulaglara bildirilýän talaplar, olaryň gümrük gözegçiligi we resmileşdirmesi üçin zerur bolan resminamalar, tölenilýän gümrük tölegleriniň her görnüşi we möçberleri barada maglumatlar bilen tanyşmaga mümkinçilik döredildi.

Sorag-jogap hyzmaty tölegsiz amala aşyrylýar.

Sorag-jogap hyzmatynyň iş wagty:

hepdäniň ýekşenbeden başga her güni, sagat 09:00-dan 17:00-a çenli

Sorag-jogap alyşmak üçin telefon belgisi: 39-41-39

«Eksport-import amallary üçin bir penjire» ulgamynyň iş netijeliligi ýokarlanýar

Fri, 30 Jan 2026 17:22:15 +0500

2025-nji ýylda ýurdumyzyň daşary söwdasynda eksport-import amallary üçin jemi 189 954 sany ygtyýarnamalar we rugsatnamalar elektron görnüşinde «Bir penjire» ulgamynyň üsti bilen resmileşdirildi. Bu görkeziji 2024-nji ýyla görä 2,7 esse ýokarlandy.

Häzirki wagtda «Bir penjire» ulgamynyň işi Döwlet gümrük gullugynyň merkezi edarasynda Gözegçilik-seljeriş merkeziniň üsti bilen utgaşdyrylýar. Ýagny, «Bir penjire» ulgamynda işleýän gözegçilik edaralary tarapyndan daşary ykdysady işine gatnaşyjylaryň ýüz tutmalaryny öz wagtynda hasaba alynmagyna we resmileşdirilmegine göni ýaýlymda gözegçilik edilýär. Bu bolsa, eksport-import amallary üçin sarp edilýän wagtyň gysgalmagyna we iş netijeliliginiň ýokary bolmagyna özüniň oňaýly täsirini ýetirýär.

Ýeri gelende belläp geçsek, ýurdumyzyň 19 sany ministrlikleriniň we pudaklaýyn dolandyryş edaralarynyň eksport we import amallary bilen bagly 29 sany hyzmatlary jemlenip, 7/24 tertibinde işleýär. Şeýle hem, bir gije-gündiziň dowamynda 1000-e golaý rugsat beriş resminamasyny resmileşdirmäge mümkinçilik berýär. Häzirki wagtda ulgamda 12 000-den gowrak daşary ykdysady işiň gatnaşyjylary hasaba alnyp, olaryň sany yzygiderli artýar.

Garaşsyz, hemişelik Bitarap Türkmenistanyň harby we hukuk goraýjy edaralarynyň harby gullukçylaryna hem-de işgärlerine

Tue, 27 Jan 2026 11:12:08 +0500

Hormatly Watan goragçylary!

Sizi «Garaşsyz, baky Bitarap Türkmenistan — bedew batly at-myradyň mekany» ýylynda bellenilýän Watan goragçylarynyň güni mynasybetli tüýs ýürekden gutlaýaryn. Eziz Watanymyzyň mukaddes Garaşsyzlygyny, hemişelik Bitaraplygyny, özygtyýarlylygyny, çäk bitewüligini, konstitusion gurluşyny, döwlet serhedimiziň mizemezligini goraýan, ýurdumyzyň howpsuzlygyny, jemgyýetçilik asudalygyny, milli kanunçylygymyzy hem-de hukuk tertibini üpjün edýän harby we hukuk goraýjy edaralaryň harby gullukçylaryna, işgärlerine bildirilýän uly ynamy dabaralandyrýan bu baýram parasatly halkymyzyň merdi-merdanalyga, Watan mukaddesligine goýýan belent hormatyny alamatlandyrýar.

2026-njy ýyl Bitarap Watanymyzyň mukaddes Garaşsyzlygynyň şanly 35 ýyllygy bilen dabaralanýar. Bu taryhy sene merdana pederlerimiziň özbaşdak döwlet gurmak baradaky asyrlarboýy kalbynda beslän arzuwlarynyň wysaly hökmünde şöhratlanýar. Biz bütin halkymyz bilen bilelikde mukaddes Garaşsyzlygymyzyň şanly toýuny ýokary guramaçylyk derejesinde, belent ruhda baýram ederis. Döwletimiziň baş baýramynyň many-mazmunyny, gadyr-gymmatyny giňden wagyz etmäge gönükdirilen tutumly işleri durmuşa geçireris.

Eziz Watanymyzyň edermen ogullary!

Watan goragy merdanalygyň milli mekdebidir. Watan goragçylary bolsa bu mekdebi mynasyp dowam etdirijilerdir. Hut şonuň üçin hem hünär taýdan taýýarlykly, beden taýdan berk, ruhy taýdan sagdyn harby gullukçylarymyzyň ýurdumyzda geçirilýän harby-okuw türgenleşiklerinde görkezýän merdi-merdanalygy, belent watansöýüjiligi ata-babalarymyzyň watanperwerlik ýörelgesiniň dowamat-dowam bolýandygyny alamatlandyrýar. Munuň özi milli Ýaragly Güýçlerimizde Watanymyzyň asudalygyny, abadançylygyny berkarar etmäge hemişe taýýar edermen gerçekleri ýetişdirmek, bilimli, harby hünäre wepaly nesilleri taýýarlamak ýaly möhüm wezipeleri üstünlikli ýerine ýetirmäge gönükdirilen tutumly işleriň oňyn netijeleri berýändigine şaýatlyk edýär. Ol merdana ýurt goragçylarymyzyň Watanymyzy goramakda öz eginlerine düşýän belent jogapkärçilige ygrarlydyklaryny görkezýär.

Merdana Watan goragçylary!

«Halkara parahatçylyk we ynanyşmak ýyly» şygary astynda geçen 2025-nji ýylda ýurdumyzda hemişelik Bitaraplygymyzyň şanly 30 ýyllygy uludan toýlanylyp, halkara derejeli iri forumlar hem-de dabaralar geçirildi. Bu çärelerde türkmen halkynyň gadymdan gelýän parahatçylyk söýüjilik, dost-doganlyk we ynanyşmak ýörelgeleri has-da dabaralandy. Siz bu ýörelgeleri mynasyp dowam etdirmelisiňiz. Watany goramak borjuny ähli zatdan belent saýyp, harby ylmyň we sungatyň gazananlaryny birkemsiz özleşdirmelisiňiz. Mukaddes Garaşsyzlygymyzyň şanly 35 ýyllyk baýramy mynasybetli geçiriljek dabaraly harby ýörişde buýsançly gadamlar bilen geçip, ömür ýoly şöhrata beslenen beýik şahsyýetlerimiziň mynasyp nesilleridigiňizi dünýä äşgär etmelisiňiz. Siziň mukaddes Garaşsyzlygymyzy, döwletimiziň dünýäde üç gezek ykrar edilen hemişelik Bitaraplyk hukuk ýagdaýyny, milli gymmatlyklarymyzy goramak ýaly belent borçlara wepaly boljakdygyňyza, gerek bolsa, munuň üçin şirin janyňyzy hem gaýgyrmajakdygyňyza berk ynanýaryn.

Watanymyzyň wepaly ogullary!

Goranyş häsiýetli Harby doktrinamyza laýyklykda hereket edýän milli Ýaragly Güýçlerimiz taryh üçin uzak bolmadyk döwrüň içinde kämil söweşjeň ýaraglar, harby tehnikalar, sanly ulgamyň mümkinçilikleri bilen yzygiderli üpjün edilip, kuwwatly goşuna öwrüldi. Häzirki wagtda ýurdumyzda Watan goragçylarynyň hem-de olaryň maşgala agzalarynyň ýaşaýyş-durmuş, gulluk, iş şertleriniň gowulandyrylmagy aýratyn üns merkezinde saklanylýar. Watan goragçylarynyň gününiň öňüsyrasynda ýurdumyzyň harby we hukuk goraýjy edaralary üçin niýetlenen köp sanly gulluk, ýaşaýyş-durmuş maksatly täze binalar we desgalar toplumlarynyň açylyp ulanmaga berilmegi ýurt goragçylaryna goýulýan sarpany has-da belende göterdi. Harby we hukuk goraýjy edaralaryň maddy-enjamlaýyn binýadyny öňküden-de döwrebaplaşdyrmak, Watan goragçylarynyň gulluk etmegi we dynç almagy üçin has oňaýly şertleri döretmek Türkmenistanyň döwlet syýasatynyň, amala aşyrýan harby özgertmelerimiziň hemişe ileri tutulýan ugurlarynyň biri bolmagynda galar.

Hormatly Watan gerçekleri!

Sizi Watan goragçylarynyň güni bilen ýene-de bir gezek tüýs ýürekden gutlaýaryn. Siziň ähliňize berk jan saglyk, maşgala abadançylygyny, mukaddes we jogapkärli gullugyňyzda hem-de işiňizde uly üstünlikleri arzuw edýärin.

Türkmenistanyň Prezidenti,
Türkmenistanyň Ýaragly Güýçleriniň Belent Serkerdebaşysy
Serdar BERDIMUHAMEDOW.