Täjirçilik maksady bilen harytlar Türkmenistandan alnyp gidilende (eksport edilende) gümrük edaralaryna berilmäge degişli resminamalaryň sanawy

1.Daşary ykdysady geleşik

Aşakdaky eksport edilýän harytlar boýunça baglaşylan geleşikler Türkmenistanyň Döwlet haryt-çig mal biržasynda bellige alynmaga degişli:

    1) döwlet eýeçiligine degişli edara görnüşli taraplaryň harytlary;

    2) döwlet eýeçiligine degişli bolmadyk edara görnüşli taraplardan we hususy telekeçilerden, ilatdan satyn alan,

bahasy 200 000 (iki ýüz müň) ABŞ-nyň dollaryndan (ýa-da şoňa barabar milli puldan ýa-da beýleki daşary ýurt pulundan) köp bolan harytlar.

2.Täjirçilik resminamalary:

    1) hasap-faktura (inwoýs);

    2) ýükläp ugradyş we gaplaýyş listleri we başga resminamalar;

3. Geleşik pasporty - bahasy erkin aýlanýan puluň çäginden, ýagny 10 000 ABŞ-nyň dollaryndan (ýa-da şoňa barabar milli puldan ýa-da beýleki daşary ýurt pulundan) köp bolan harytlar üçin berilýär.

4. Ulag (daşaýyş) resminamasy - awtoulag serişdesinde daşalanda - halkara ýol-ulag resminamasy (CMR), demir ýol ulag serişdesinde daşalanda - halkara demir ýol-ulag resminamasy, deňiz gämisinde daşalanda konosament, howa gämisinde daşalanda - awia ýol-ulag resminamasy.

5. Türkmenistanyň kanunçylygynda bellenilen çäklendirmeleriň berjaý edilmegini tassyklaýan rugsat beriji resminamalar:

    1) maldarçylyk önümleri üçin weterinariýa sertifikaty;

    2) gelip çykyşy ösümlikden bolan önümler üçin fitosanitar sertifikaty;

    3) sungat eserleri (şekillendiriş grafikasy, žiwopisi), gadymy arheologiki zatlar hem-de çeperçilik,taryhy, ylmy we medeni gymmaty bolan beýleki zatlar üçin Türkmenistanyň Medeniýet ministrliginiň rugsady;

    4) elde dokalan haly we haly önümleri üçin «Türkmenhaly» döwlet birleşiginiň güwänamasy (netijenamasy);

    5) Türkmenistanyň kanunçylygynda bellenilen ýagdaýlarda, degişliligi boýunça başga rugsat beriji resminamalar.

6. Harydyň gelip çykyşy tassyklaýan güwänama (deklarasiýa):

    1) Türkmenistanda öndürilen harytlar üçin Harydyň gelip çykyşy tassyklaýan güwänama;

    2) Daşary ýurtda öndürilen harytlar üçin Türkmenistana getirilende resmileşdirilen ýük gümrük deklarasiýasy.

7. Daşary ykdysady işiň haryt nomenklaturasy boýunça harytlaryň toparlara bölüniş koduny tassyklaýan resminamalar:

    1) harydyň doly beýany görkezilen täjirçilik resminamalary;

    2) öndürilende berlen laýyklyk sertifikaty;

    3) tehniki resminamalar we hil pasporty.

8. Eksport edýän şahs hakyndaky maglumatlary tassyklaýan resminamalar:

    1) kärhananyň esaslandyryş resminamasy (tertipnamasy);

    2) hususy telekeçiniň bellige alyş şahadatnamasy;

    3) Türkmenistanyň ýuridik şahslarynyň ýeke-täk döwlet sanawyndan göçürmesi;

    4) daşary ykdysady işe gatnaşyjynyň şahadatnamasy (kiçi we orta telekeçiligiň subýektlerine - güwänama);

    5) eksport edýän şahsyň harytlara bolan ygtyýarlygyny tassyklaýan resminamalar.

9. Bellenilen tertipde doldurylan ýük gümrük deklarasiýasy

10. Gümrük tölegleriniň tölenilendigini tassyklaýan resminama