2025-nji ýylyň 10-11-nji sentýabrynda Türkmenistanyň Döwlet gümrük gullugynyň edara binasynda TIR konwensiýasynyň we eTIR ulgamynyň işini kadalaşdyrýan 11-nji goşundysynyň ýerine ýetirilişi boýunça okuw çäresi geçirildi. Çäre, Birleşen Milletler Guramasynyň Ýewropa ykdysady komissiýasynyň TIR sekretariaty we Halkara ýol ulaglary bileleşigi (IRU) tarapyndan guraldy.

Çäräni Birleşen Milletler Guramasynyň Ýewropa ykdysady komissiýasynyň TIR sekretariatynyň wekilleri Sami Ganmi (Şweýsariýa)  we Elýor Hakimow (Özbegistan) hem-de Halkara ýol ulaglary bileleşiginiň TIR boýunça geňeşçisi Wahtang Zarandia geçirdiler. Çärä, şeýle-de Türkmen halkara awtoulagly daşaýjylarynyň assosiasiýasynyň wekilleri gatnaşdy. 

Türkmen tarapdan, okuwa Türkmenistanyň Döwlet gümrük gullugynyň gümrük amallarynda sanly çözgütleriň ornaşdyrylmagyna jogapkär hünärmenleri gatnaşdy.

Çäräniň birinji güni, TIR konwensiýasynyň hukuk we amaly taraplaryny, deslapky deklarirlemegiň mümkinçiliklerini we eTIR ulgamynyň ösüşinde hususy pudagyň orny boýunça meselelere seredildi. Milli eTIR programmasynyň uýgunlaşmagyna we halkara hyzmatdaşlar bilen gatnaşyklara aýratyn üns berildi.

Ikinji gün, enjam, serwer infrastrukturasy we programma üpjünçiligini gurmak amallary ýaly eTIR ulgamyny durmuşa geçirmegiň tehniki bölegine bagyşlandy. Gatnaşanlara açyk çeşme çözgütlerini ulanmak boýunça UNECE hünärmenlerinden amaly düşündirişler we teklipler berildi.