2023-nji ýylyň 22-24-nji awgusty aralygynda Gyrgyzystan Republikasynyň Bişkek şäherinde Birleşen Milletler Guramasynyň Neşe we jenaýatçylyk baradaky müdirliginiň hem-de Bütindünýä gümrük guramasynyň Konteýner gatnawlaryna gözegçilik etmek boýunça Ählumumy maksatnamasynyň gümrük gulluklaryň we port gözegçilik toparlaryň agzalary üçin gender deňligi meselesini işjeňleşdirmek boýunça Sebitleýin okuw çäresi geçirildi. Sebitleýin okuwy Birleşen Milletler Guramasynyň Neşe we jenaýatçylyk baradaky müdirliginiň hem-de Bütindünýä gümrük guramasynyň halkara bilermenleri alyp bardylar.

Çärä  Türkmenistanyň, Gazagystanyň, Özbegistanyň, Gyrgyzystanyň, Täjigistanyň we Pakistanyň gümrük we beýleki edaralarynyň wekilleri, şol sanda zenan gullukçylar gatnaşdylar.

Okuwyň dowamynda Türkmenistanyň Döwlet gümrük gullugynyň wekilleri gümrük edaralarynda gender syýasatynyň amala aşyrylyşy boýunça Türkmenistanyň tejribesi bilen paýlaşdylar, okuwa gatnaşyjylar zenan harby gullukçylaryň gatnaşmagynda şekilli wideo syn tomaşa etdiler.

Wekiliýetiň agzasynyň belleýşi ýaly, Türkmenistanda eýýäm ençeme ýyllar bäri gümrük edaralarynyň hatarynda zenan işgärler hem gulluk edip gelýär. Olar erkek gullukçylar bilen bir hatarda bikanun söwdanyň öňüni almak, gümrük tölegleriniň doly we dürs töletdirilmegi, gümrük statistikasyny ýöretmek boýunça wezipe borçlaryny üstünlikli berjaý edýärler, şeýle hem gümrük edaralaryna ornaşdyrylan ösen gümrük tehnologiýalaryny özleşdirýärler. Gümrük gullugynyň zenan gullukçylarynyň hatarynda milli we halkara derejeli sport ýaryşlarynyň ýeňijileri hem bar.

Görkezilen şekilli wideorolige ýokary baha berildi. Türkmenistanyň gümrük edaralarynda gulluk edýän zenan gullukçylaryň üstünlikleri halkara bilermenler we gatnaşyjylar tarapyndan gyzgyn garşylandy.